សារព័ត៌មាន Fox Sport និយាយថា ការទៅលេងនៅជប៉ុន គឺជាការបាត់បង់ឱកាសដ៏ធំមួយរបស់ ចាន់ វឌ្ឍនាកា

អាស៊ី៖ បើយោងតាមការចុះផ្សាយរបស់សារព័ត៌មាន Fox Sport Asia ដែលជាគេហទំព័រដ៏ល្បីនៅក្នុងតំបន់អាស៊ី បានឲ្យដឹងថា ការផ្ទេរទៅលេងនៅក្លិបរបស់ប្រទេសជប៉ុន គឺជាការបាត់បង់ឱកាសដ៏ធំមួយ របស់ខ្សែប្រយុទ្ធឆ្នើម ចាន់ វឌ្ឍនាកា។

ប្រភពបានអះអាងឲ្យដឹងបន្តទៀតថា ខ្សែប្រយុទ្ធវ័យ២៣ឆ្នាំ ចាន់ វឌ្ឍនាកា គួរតែទៅលេងនៅប្រទេសសាំងហ្គារពួរ ឬម៉ាឡេស៊ី ប្រសើរជាងទៅលេងនៅលីកទី៣ របស់ប្រទេសជប៉ុន។  

ក្នុងនោះដែរ សារព័ត៌មាន Fox Sport Asia បានលើកហេតុផលសាមញ្ញមួយថា ប្រសិនបើកីឡាករខ្លាំងនៅអាស៊ីអាគ្នេយ៍ទៅលេងនៅជប៉ុន នោះវានឹងធ្វើឲ្យមានការចាប់អារម្មណ៍ពីអ្នកគាំទ្រនៅប្រទេសកំណើតរបស់ពួកគេ។ ហើយប្រសិនបើកីឡាករទទួលបានជោគជ័យទៀតនោះ គឺវាអាចនឹងរឹតតែធ្វើឲ្យមានការរំភើបពី អ្នកគាំទ្រ ប្រព័ន្ធសារព័ត៌មាន និងចុងក្រោយគឺអ្នកឧបត្ថម្ភ។

Fox Sport បានបន្ថែមទៀតថា ជាក់ស្តែងករណីនេះវាមិនទាន់កើតឡើងនៅឡើយទេ។ កីឡាករដែលធ្លាប់ទៅលេងនៅទីនោះទាំងប៉ុន្មាន មិនទាន់មាននរណាធ្វើឲ្យមានការប្រែប្រួលធំដុំនៅឡើយ តែពួកគេក៏បានទទួលប្រយោជន៍ជាច្រើនពីការលេងនៅជប៉ុន សម្រាប់ខ្លួនគេផ្ទាល់ផងដែរ។

យ៉ាងណាមិញ សារព័ត៌មានកីឡាដ៏ល្បីមួយនេះ ក៏បានលើកសរសើរ ចាន់ វឌ្ឍនាកា គឺជាកីឡាករល្អ មានទេពកោសល្យដ៏ខ្លាំងមួយរូបផងដែរ តែក្នុងនោះពួកគេបានផ្តល់ជាគំនិតបន្ថែមទៀតថា បើសិន វឌ្ឍនាកា ចង់ទៅលេងនៅជប៉ុននោះ គេអាចសម្រេចទៅលេងនៅពេលក្រោយបាន តែគេត្រូវបន្សំសមត្ថភាពរបស់គេឲ្យខ្លាំងនៅតំបន់អាស៊ីអាគ្នេយ៍សិន ហើយនៅពេលដែលគេខ្លាំងហើយ គេអាចនឹងទៅលេងនៅលីកកំពូលរបស់ប្រទេសជប៉ុនផងក៏ថាបានដែរ។ បើតាមការអះអាងរបស់ Fox Sport ចង់បង្ហាញឲ្យឃើញថា វឌ្ឍនាកា គួរតែទៅលេងនៅសាំងហ្គាពួរ ឬម៉ាឡេស៊ីឲ្យខ្លាំងសិន ចាំសម្រេចទៅលេងនៅជប៉ុនតាមក្រោយ៕

យ៉ាងណាក៏ដោយ ចាន់ វឌ្ឍនាកា បានសម្រេចផ្ទេរទៅលេងនៅជប៉ុនរួចរាល់ហើយក្នុងល័ក្ខខ័ណ្ឌខ្ចីជើង តើចាំមើលថា វឌ្ឍនាកាអាចវិវឌ្ឍន៍ខ្លួនបាន ឬយ៉ាងណា? 

ប្រភព : Fox Sport Asia

ដោយឡែករំលឹកព័ត៌មានមួយផ្សេងទៀត៖ Ronaldo និង​ Messi បញ្ចេញសារទាំងក្តីឈឺចាប់ ផ្ញើជូនកុមារដែលរងគ្រោះ ដោយសារសង្គ្រាមនៅសីុរី

បរទេស៖ ត្បិតតែ Cristiano Ronaldo និង Lionel Messi ជាកីឡាករបាល់ទាត់ដែលមានកេរ្តិ៍ឈ្មោះល្បីល្បាញពិតមែន ប៉ុន្តែបើនិយាយរឿងសប្បុរសធម៌វិញ អ្នកទាំងពីរមិនដែលភ្លេចទេ ក្នុងការផ្តល់ជាជំនួយ ឬក៏ផ្ញើជាសារលើកទឹកចិត្តដល់ជនរងគ្រោះជាច្រើនជុំវិញពិភពលោក។

ជាក់ស្តែងថ្មីៗនេះ ទាំង Ronaldo និង Messi បានបង្ហាញសារក្តុកក្តួលមួយនៅក្នុងបណ្តាញសង្គមរបស់ខ្លួន ផ្ញើជូនទៅក្មេងៗជាច្រើនដែលរងគ្រោះដោយសារសង្គ្រាម។

គួរឲ្យដឹងថា អ្នកទាំងពីរសុទ្ធតែជាឪពុក និងមានកូនៗដូចគ្នា ដូច្នេះពួកគេមិនចង់ឃើញមានកុមាររងគ្រោះនោះឡើយ មិនថារងគ្រោះដោយហិង្សា ឬរងគ្រោះអត់ឃ្លាន ទើបដូច្នេះហើយ ក្នុងនាមជាអត្តពលិកដ៏ល្បី ពួកគេក៏បានផ្ញើជាសារមួយទាំងក្តីឈឺចាប់ ដើម្បីទាមទារឲ្យមានសន្តិភាពឡើងវិញ។

ក្នុងនោះ ខ្សែប្រយុទ្ធឆ្នើមលេងឲ្យក្លិប Barcelona និងជាអគ្គរដ្ឋទូតរបស់អង្គការ UNICEF កីឡាករ Lionel Messi បានផ្ញើសារទាំងក្តីឈឺចាប់ថា «មិននឹកស្មានថាសង្គ្រាមទាំងនេះបានកើតឡើងអស់រយៈពេល៦ឆ្នាំ វាពិតជាច្រើនពេកហើយ។ កុមារនៅស៊ីរីជាច្រើន បានរងគ្រោះដោយសារ ហិង្សា សម្លាប់យ៉ាងឃោរឃៅ ឯខ្លះទៀតចាប់ទុកធ្វើជាចំណាប់ខ្មាំងអស់រយៈពេល៦ឆ្នាំ» ។

Messi បានបន្តទៀតថា «ក្នុងនាមជាឯកអគ្គរាជទូតរបស់ UNICEF ខ្ញុំពិតជាឈឺចាប់ណាស់ ដូច្នេះអ្នកទាំងអស់គ្នា គួរតែនាំគ្នាបញ្ចេញមតិឡើងទៅកាន់អង្គការ UNICEF ដើម្បីទាមទារឲ្យបញ្ឈប់ និងបញ្ចប់សង្គ្រាមទាំងនេះវិញ»។

ដោយឡែកចំពោះខ្សែប្រយុទ្ធរបស់ក្លិប Real Madrid កីឡាករ Cristiano Ronaldo វិញបានបង្ហោះរូបភាពមួយសន្លឹកជាមួយកូនប្រុសរបស់ខ្លួន រួចផ្ញើជាសារនៅក្នុងបណ្តាញសង្គមផងដែរថា «ថ្ងៃនេះខ្ញុំមានការនឹករលឹកដល់កុមារស៊ីរីម្នាក់ឈ្មោះ Omar ដែលគេមានក្តីស្រមៃចង់ក្លាយជាជាងកាត់សក់ #ជួយសង្រ្គោះកុមារស៊ីរី » ។

គួររំលឹកបន្ថែមទៀតថា កាលពីអំឡុងខែធ្នូ ឆ្នាំ២០១៦ កន្លងទៅ Ronaldo ធ្លាប់បានធ្វើរឿងសប្បុរសមួយ ដោយបានបរិច្ចាគនូវមូលនិធិ និងសម្ភារៈ ដូចជាអាហារ សម្លៀកបំពាក់ និងថ្នាំពេទ្យជាច្រើន ដើម្បីបញ្ជូនទៅផ្គត់ផ្គង់កុមារដែលរងគ្រោះនៅស៊ីរីដោយសារសង្រ្គាមទាំងនេះ៕